Kryeministri i Kosovës, Albin Kurti, ka shprehur mirënjohje të thellë për qytetarët që i dhanë besimin e tyre në zgjedhjet e 28 dhjetorit, duke e rizgjedhur në krye të qeverisë për një mandat të ri. Në një deklaratë pas fitores, Kurti falënderoi edhe diasporën për mbështetje, duke e cilësuar këtë fitore si historike.

“Mirëdita të dashur qytetarë, Në dhjetë ditë fushatë, dhjetëra mijëra duar të shtrënguara e mijëra dyer të hapura nga ju në qindra takime e tubime anembanë. Na pritët me ngrohtësi e besim, e për këtë ju falënderoj përzemërsisht. Jeni shumë, madje aq shumë sa shumicës nuk ua njohim e dimë emrin. Dhe, u angazhuat pa kursim për fitoren e VETËVENDOSJE!-s me partnerë, për fitoren tuaj.

Të dashur bashkatdhetarë që erdhët nga Evropa, Amerika e nga çdo cep i botës, ose që votuat me postë apo fizikisht pardje në ambasadat e konsullatat tona, u jemi mirënjohës përjetë për kontributin tuaj të pamatshëm për liri e shtet dhe komb, si dhe për përkrahjen vendimtare që e bëri fitoren në këto zgjedhje aq madhështore saqë historike.

Puna vazhdon, siguria e begatia do të shtohen. Na priftë e mbara!”, shkruan Kurti.

Lëvizja Vetëvendosje ka dalë forcë e parë në zgjedhjet e parakohshme, duke siguruar rreth 50% të votave, dhe tashmë Kurti ka marrë numrat e nevojshëm për të formuar qeverinë, duke i dhënë fund një periudhe ngërçi politik që ka zgjatur 9 muaj.

/rtsh.al/