Ministri i Financave, Petrit Malaj, priti në një takim Ambasadorin e Shteteve të Bashkuara në NATO, Matthew Whitaker, së bashku me delegacionin që e shoqëronte.

Ministri Malaj theksoi angazhimin e Shqipërisë për të vijuar përpjekjet në forcimin e kapaciteteve mbrojtëse dhe rritjen e qëndrueshmërisë kombëtare: 

 “Shqipëria mbetet e vendosur në përmbushjen e angazhimeve të saj në kuadër të Aleancës Euroatlantike, duke vijuar përpjekjet për forcimin e kapaciteteve mbrojtëse dhe rritjen e qëndrueshmërisë kombëtare.” 

Ai shtoi se vendi do të kontribuojë në mënyrë progresive në rritjen e investimeve në fushën e mbrojtjes, duke përmendur objektivin e përbashkët të vendeve anëtare për të arritur nivelin deri në 5% të PBB-së deri në vitin 2035: 

 “Shqipëria do të vijojë të kontribuojë në mënyrë progresive në rritjen e investimeve në fushën e mbrojtjes, në përputhje me angazhimin e përbashkët të vendeve anëtare për të arritur nivelin deri në 5% të PBB-së deri në vitin 2035, me fokus të veçantë në zhvillimin e industrisë ushtarake dhe inovacionit teknologjik.” 

Sipas ministrit Malaj, ky orientim strategjik konsolidon më tej profilin e Shqipërisë si një partner i besueshëm dhe kontribues aktiv në NATO. 

“Ky orientim strategjik konsolidon më tej profilin e Shqipërisë si një partner i besueshëm dhe kontribues aktiv në NATO.” 

Në një reagim në rrjetet sociale, Malaj e cilësoi takimin si të rëndësishëm, duke nënvizuar se së bashku me Ministrin e Mbrojtjes, Ermal Nufi, u rikonfirmua partneriteti i konsoliduar strategjik mes Shqipërisë dhe Shteteve të Bashkuara, si një shtyllë kyçe e arkitekturës së sigurisë. 

/rtsh.al/