Ky sezon ka qenë mjaft i mbarë për Galerinë e Arteve në Sarandë, me një interes dhe vizitueshmëri më të lartë krahasuar me vitin e kaluar. Sipas cicerones Jolanda Kabo, fluksi i vizitorëve ka qenë i qëndrueshëm gjatë gjithë periudhës së verës.

Risi e këtij viti, sipas Kabo, ka qenë vizitueshmëria e lartë nga moshat e reja. Ajo shprehet se të rinjtë e vizitojnë galerinë për t’u njohur më shumë me kulturën dhe artin pamor lokal, duke treguar një interes në rritje për këtë fushë.

“Ka pasur grupmosha të ndryshme, por sivjet ka rënë në sy një rritje e numrit të të rinjve që kanë vizituar galerinë tonë”, u shpreh ciceronia

Gjithashtu, Kabo thekson se edhe muaji shtator ka shënuar një numër të lartë vizitorësh, duke e mbajtur Galerinë e Arteve në Sarandë një nga destinacionet kulturore më të frekuentuara në qytet.

“Me thënë të drejtën, nëse gjykojmë nga prurja e vizitorëve deri tani, unë mund të them që nuk e kemi ndjerë uljen. Është e njëjta vizitueshmëri si në gusht, edhe në shtator. Duke gjykuar nga kjo, mendoj dhe besoj se do akoma kohë që ta ndjejmë ikjen e sezonit”, tha ajo.

Rritja e vizitueshmërisë dhe interesi i shtuar, veçanërisht nga të rinjtë, tregojnë se Galeria e Arteve në Sarandë po konsolidohet gjithnjë e më shumë si një hapësirë e rëndësishme për promovimin e kulturës dhe artit pamor në qytet.

Gazetare B.Gjyli

/rtsh.al/