Një ngjarje tragjike ka ndodhur në rajonin turistik të Kapadokisë në Turqinë qendrore, ku shembja e një formacioni të njohur shkëmbor ka shkaktuar vdekjen e të paktën tre personave dhe plagosjen e një tjetër.

Sipas autoriteteve lokale, një pjesë e formacionit shkëmbor vullkanik, i njohur si “oxhak zanash”, u shemb të enjten në zonën e Goremes, duke zënë poshtë vizitorë që ndodheshin pranë tij.

Menjëherë pas incidentit, në vendngjarje u dërguan ekipe të emergjencës, forca shpëtimi dhe personel mjekësor për të ndihmuar të lënduarit dhe për të kërkuar persona të tjerë që mund të jenë bllokuar nën rrënoja.

Guvernatori i zonës, Huseyin Kok, deklaroi se shkaku i shembjes dyshohet të jenë reshjet e dendura të shiut që kanë përfshirë rajonin gjatë ditëve të fundit, duke dëmtuar qëndrueshmërinë e formacionit natyror.

Autoritetet bënë të ditur se operacionet e kërkim-shpëtimit vijojnë, ndërsa deri më tani nuk janë publikuar detaje mbi identitetin apo kombësinë e viktimave.

Kapadokia, e përfshirë në Listën e Trashëgimisë Botërore të UNESCO-s, është një nga destinacionet turistike më të njohura në Turqi dhe në botë. Rajoni tërheq çdo vit miliona vizitorë falë peizazheve unike, formacioneve karakteristike shkëmbore dhe qyteteve të lashta nëntokësore.

Shembja ndodhi në Ditën e Republikës së Turqisë, një festë kombëtare që sjell fluks të lartë turistësh në zonë, çka ngre shqetësime se numri i personave të prekur mund të ndryshojë ndërsa vijojnë kërkimet.

/rtsh.al/