Kufizimi i furnizimit me ujë të Gazës nga Izraeli në nivele nën nevojat minimale përbën një akt gjenocidi dhe shfarosjeje, si një krim kundër njerëzimit. Kështu nënvizohet në raportin e të drejtave të njeriut, Human Roights Watch, pas hetimit të sulmeve izraelite në infrastrukturën e furnizimit me ujë në Gaza gjatë luftës së saj 14-mujore atje.

HRW ka akuzuar forcat izraelite për veprime të qëllimshme që synojnë të zvogëlojnë disponueshmërinë e ujit të pastër në mënyrë drastike sa që popullsia është detyruar të përdorë burime të kontaminuara, duke çuar në shpërthimin e sëmundjeve vdekjeprurëse, veçanërisht në mesin e fëmijëve.

Veprimet e Izraelit kanë vrarë mijëra palestinezë dhe përbëjnë një akt gjenocidi, argumenton HRË, duke cituar deklaratat e ministrave në koalicionin qeverisës të vendit se furnizimi me ujë i Gazës do të ndërpritet si dëshmi e qëllimit.

Izraeli ka hedhur poshtë akuzat se ka kryer gjenocid ose krime kundër njerëzimit në Gaza. Kryeministri i vendit, Benjamin Netanyahu, i ka konsideruar këto akuza si të rremë.

Qeveria e tij ka këmbëngulur në të drejtën e saj për vetëmbrojtje pas sulmit tronditës të Hamasit ndaj komuniteteve në Izraelin jugor më 7 tetor 2023, në të cilin u vranë 1200 njerëz dhe rreth 250 u morën peng.

Akuzat e paraqitura nga HRW nuk janë aq të gjera sa ato të Amnesty-së, duke u fokusuar veçanërisht në furnizimin me ujë të Gazës, por organizata pretendon se provat janë dërrmuese se Izraeli ka përdorur ujin si armë kundër popullatës palestineze kolektivisht, me rezultate vdekjeprurëse.

/rtsh.al/