Ambasada e Shteteve të Bashkuara të Amerikës në Tiranë u ka bërë thirrje sot shtetasve amerikanë që të shmangin protestat dhe grumbullimet, pas përshkallëzimit të situatës gjatë një tubimi që po zhvillohet në Rrugën e Durrësit, pranë Sheshit “Skënderbej”.

Përmes një njoftimi zyrtar, diplomacia amerikane bën me dije se protesta është shndërruar në të dhunshme për shkak të goditjeve me gurë, ndërsa paralajmëron se situata mund të shtrihet edhe në blloqet përreth dhe pranë ndërtesave qeveritare.

“Një protestë në Rrugën e Durrësit, ngjitur me Sheshin Skënderbej, është duke vazhduar aktualisht dhe është shndërruar në të dhunshme për shkak të hedhjes së gurëve. Protesta mund të zgjerohet në blloqet dhe ndërtesat qeveritare aty pranë”, thuhet në njoftim.

Ndikimi në qarkullim dhe udhëzimet për personelin

Sipas ambasadës, përshkallëzimi i tubimit mund të sjellë shtim të pranisë policore, ndërprerje të trafikut, devijime të qarkullimit si dhe bllokime të akseve rrugore në qendër të kryeqytetit. Për këtë arsye, personelit të ambasadës i është rekomanduar heqja dorë nga kalimi apo prania në zonat ku zhvillohen manifestime.

Përveç kësaj, trupa diplomatike u kërkon shtetasve amerikanë që të vendosin sigurinë personale në plan të parë dhe të ndjekin me vëmendje udhëzimet e autoriteteve vendore të rendit.

“Ju lutemi qëndroni vigjilentë dhe jepini përparësi sigurisë suaj personale. Monitoroni median lokale dhe ndiqni udhëzimet e autoriteteve lokale të zbatimit të ligjit për informacionet më të fundit.”, theksohet në njoftim.

Masat e këshilluara për sigurinë personale

Për të minimizuar rreziqet, Ambasada e SHBA-së ka listuar disa udhëzime praktike për përforcimin e sigurisë individuale:

Shmangia e plotë e protestave dhe demonstratave.

Tregimi i kujdesit ndaj mjedisit përreth dhe kufizimi i shpërqendrimeve, si përdorimi i telefonave apo kufjeve në hapësira publike.

Ndjekja e vazhdueshme e njoftimeve në mediat lokale.

Hartimi i një plani emergjence apo strategjie daljeje për çdo situatë të paparashikuar.

Ruajtja e një profili të ulët për të mos tërhequr vëmendjen në publik.

/rtsh.al/