Presidenti i Rusisë, Vladimir Putin, tha të enjten se Sllovakia ka shprehur gatishmëri që të jetë vendi organizator i bisedimeve të mundshme të paqes mes Moskës dhe Kievit, për t’i dhënë fund luftës në Ukrainë.

“[Robert] Fico tha se nëse bëhet fjalë për negociata, autoritetet sllovake do të ishin të lumtura të ofronin vendin e tyre si një platformë për zhvillimin e tyre Ne nuk jemi kundër, nëse bëhet fjalë për këtë. Pse jo? Meqenëse Sllovakia mban një pozicion kaq neutral, ky është një opsion i pranueshëm për ne,” u shpreh Putin.

Ai ka thënë vazhdimisht se Rusia është e hapur për bisedime për t’i dhënë fund konfliktit me Kievin, por se gjithsesi do t’i arrijë synimet e veta në Ukrainë.

Ndërkohë lideri rus u shpreh se Moska mund ta përdorë sërish raketën e re hipersonike balistike me rreze të mesme veprimi, e njohur si Oreshnik.

“Ne nuk e përjashtojmë mundësinë për ta përdorur atë sot dhe nesër, nëse është e nevojshme,” tha Putin.

Shefi i Kremlinit priti këtë javë Kryeministrin sllovak në Moskë, ndërsa Fico njihet si një kundërshtar i hapur i mbështetjes së Bashkimit Evropian për Ukrainën.

Pas ardhjes në pushtet vitin e kaluar, ai ai dha fund ndihmës ushtarake të Sllovakisë për Kievin, goditi sanksionet e BE-së ndaj Rusisë dhe ka paralajmëruar të bllokojë anëtarësimin e Ukrainës në NATO.

Gazetare: Vjollca Zharri

/rtsh.al/