Ndeshjet e radhës të vlefshme për Eliminatoret e Euro 2026 për moshat deri në 21 vjeç do të jenë një shans i artë për komisarin teknik të Gjermanisë, Antonio Di Salvo, për të integruar lojtarë të rinj.

Kështu në listën e bërë publike sot nga trajneri i Gjermanisë U-21 spikat emri i Arijon Ibrahimoviç, i cili deri pak javë më parë ishte në bisedime me drejtuesit e Federatës Kosovare të Futbollit. 19-vjeçari, i cili është kontaktuar edhe nga Federata Shqiptare e Futbollit, duket se ka vendosur për të marrë një tjetër rrugë. Nëse do të ketë sukses me ekipin shpresa të Gjermanisë atëherë Federatat e tjera, të cilat kanë shpresuar për ta grumbulluar sulmuesin e 1. FC Heidenheim do të duhet të dorëzohen.

Një tjetër risi e listës të shpallur nga Di Salvo për takimet me Maltën dhe Gjeorgjinë është edhe emri i Lennart Karl, i cili ka djegur etapat duke u grumbulluar me U-21 edhe pse është vetëm 17 vjeç.