Kryegjyshi Botëror, shenjtëria e tij Haxhi Dede Baba Edmond Brahimaj, priti në selinë e shenjtë të Kryegjyshatës Botërore Bektashiane delegacionin e Shtetit të Holandës, të kryesuar nga znj. Bea-Sen Tussher, e dërguar speciale e Ministrisë së Jashtme të Vendeve të Ulëta për fetë dhe liritë fetare.

Kryegjyshi Botëror Bektashian e njohu delegacionin me rolin historik që ka luajtur bektashizmi në çështjen kombëtare. Ai theksoi se vizioni që përçon bektashizmi sot është një mesazh i madh për harmoni, tolerancë dhe bashkëjetesë fetare, si thesari i unitetit, sigurisë dhe paqes.

Kryegjyshi Botëror Baba Mondi shtoi se nisma e kryeministrit Edi Rama për krijimin e shtetit sovran bektashi është një vlerësim për rolin që ka luajtur Kryegjyshata Botërore si qendër e bektashinjve të botës në mbi 33 vende dhe për vizionin e bektashizmit për paqe dhe vëllazëri botërore, me të gjitha fetë dhe të gjithë popujt, për të ecur së bashku dhe për të jetuar si vëllezër.

Znj. Bea-Sen Tussher, pasi falënderoi Kryegjyshin për mikpritjen, theksoi se roli i bektashizmit është shumë i rëndësishëm për promovimin e vlerave të islamit të sotëm, të inkorporuar në shoqërinë e sotme europiane. Ajo vlerësoi gjithashtu se shteti Sovran Bektashi do të përçojë vlera të reja, të domosdoshme për shoqërinë e sotme njerëzore.

/rtsh.al/