Nevoja për gjak në Spitalin Rajonal të Shkodrës mbetet e vazhdueshme, ndërsa aktualisht ka rezerva të pamjaftueshme për disa grupe gjaku.

Sipas punonjësve të bankës së gjakut në Shkodër, familjarët e të sëmurëve mbeten dhuruesit kryesorë, por kontributi i tyre nuk arrin të përmbushë nevojat në rritje për gjak.

“Rezervat e gjakut ne i sigurojmë kryesisht me familjarët. Kemi edhe vullnetarë, pasi bëjmë thirrje kryesisht te infermieria për grupet e rralla: AB-, A-, B-, 0-. Për 0- kryesisht ka më shumë nevojë,” thotë infermierja Leze Tomaj.

Një rëndësi të veçantë në këtë drejtim ka shtimi i dhuruesve vullnetarë, të cilët në disa periudha janë të paktë.

Për të adresuar këtë situatë, Dega e Kryqit të Kuq në Shkodër ndërmerr rregullisht fushata dhe aktivitete sensibilizuese me synimin për të rritur numrin e dhuruesve.

“Nevojat për gjak janë të mëdha në Spitalin Rajonal Shkodër, jo vetëm për grupet e shpeshta, siç janë 0+ dhe A+, por edhe për grupe të rralla, siç janë 0- dhe A-. Ne si Kryq i Kuq bëjmë thirrje vazhdimisht për dhurime vullnetare të organizuara, por edhe për dhurime sporadike për nevoja të veçanta, siç janë grupet e rralla,” shprehet Vera Gjinaj, koordinatore për dhurimin e gjakut në Kryqin e Kuq në Shkodër.

Aktualisht, siç bëhet e ditur nga dega e Kryqi të Kuq në Shkodër, dhuruesit më të shumtë janë të rinjtë, veçanërisht studentët e Universitetit të Shkodrës, Dega Infermieri.

Apeli për dhurim gjaku mbetet i hapur për të gjithë qytetarët që duan të japin kontributin e tyre në shpëtimin e jetëve.

Gazetar: A. Hoti

/rtsh.al/