Aleksandra Thoma nga fshati Andon Poçi i njësisë administrative Odrie në Bashkinë e Gjirokastrës ka mësuar artin e nxjerrjes së rakisë që prej një moshe të re.

Ky zanat i trashëguar nga familja e saj është kthyer në pasion dhe Aleksandra vazhdon ta ruajë me fanatizëm edhe sot. Ka tre ditë që Aleksandra ka nisur prodhimin e rakisë dhe planifikon ta përfundojë këtë sezon brenda dhjetë ditëve.

Ajo tregon se çdo hap i procesit është i rëndësishëm për të ruajtur cilësinë dhe shijen autentike të produktit.

“E kam mësuar nga familjarët që në moshë të vogël”, shprehet ajo.

Procesi i nxjerrjes së rakisë kërkon kujdes të madh. Kazani i saj është i vjetër dhe punon me dru, duke i dhënë rakisë një aromë të veçantë dhe tradicionale. Aleksandra ndjek të gjitha fazat me përpikëri, nga fermentimi e deri tek distilimi në kazanin e vjetër.

Përtej përfitimeve ekonomike, më e rëndësishme për të është ruajtja e një tradite shekullore. Ajo shpreson që edhe brezat e ardhshëm të tregojnë interes për këtë zanat dhe të vazhdojnë artin e nxjerrjes së rakisë, duke mbajtur gjallë kulturën e zonës .

Gazetare: B.Pëllumbi

/rtsh.al/