Në qarkun e Shkodrës, vijojnë të jenë aktive vatrat e zjarrit në pyjet në Malin e Tërbuinit dhe në zonën Gjegjan–Gojan në Bashkinë Pukë. Në një përditësim lidhur me situatën, Perfekti i qarkut bën me dije se në Malin e Tërbunit situata është nën kontroll, por problematike situata paraqitet në zonën Gjegjan–Gojan, ku flakët janë përhapur për shkak të favorizimit nga temperaturat tepër të larta dhe era.

Në terren janë angazhuar dy mjete zjarrfikëse të Bashkive Pukë dhe Fushë-Arrëz, efektivë të MZSH Pukë dhe Fushë-Arrëz, si dhe 40 efektivë të Forcave të Armatosura, punonjës të administratës, banorë dhe vullnetarë të zonës.

Ndërhyrja po mbështetet nga ajri me dy helikopterë, të cilët po operojnë në zonat ku terreni i vështirë kufizon ndërhyrjen nga toka. Aktualisht nuk raportohet afërsi kritike me banesat.

“Institucioni i Prefektit të Qarkut Shkodër vijon monitorimin e pandërprerë të situatës dhe koordinimin e të gjitha strukturave dhe kapaciteteve të angazhuara në terren për mbrojtjen e jetës dhe banesave të qytetarëve deri ne normalizimin e situatës”, thuhet në njoftim.

/rtsh.al/