Përshpejtuesi i Inovacionit të Mbrojtjes të NATO-s për Atlantikun e Veriut (DIANA) dhe Ukraina nënshkruan një memorandum mirëkuptimi (MoU). Ky dakordësim hap mundësi të reja për zhvillimin dhe testimin e përbashkët të teknologjive, si dhe për thellimin e bashkëpunimit ndërmjet ekosistemeve të inovacionit të Ukrainës dhe NATO-s.

Marrëveshja, e nënshkruar në Selinë Qendrore të NATO-s, është e para e këtij lloji ndërmjet DIANA-s dhe një partneri të NATO-s, duke shënuar një hap praktik drejt forcimit të sigurisë së përbashkët përmes inovacionit. Ajo gjithashtu bazohet në bashkëpunimin më të gjerë NATO-Ukrainë në valën e inovacionit, i cili është zhvilluar ndjeshëm që nga nisja e pushtimit me shkallë të plotë të Ukrainës nga Rusia.

Ky partneritet mbështetet mbi parimin e reciprocitetit. Ukraina ka zhvilluar një ekosistem të jashtëzakonshëm inovacioni ndërsa përballet me realitetin e konfliktit modern, duke testuar, përshtatur dhe përmirësuar me shpejtësi teknologjinë në kushtet më kërkuese si pasojë e luftës agresive të Rusisë. Nga ana tjetër, DIANA ofron një rrugë të konsoliduar që lidh inovatoret me ekspertizën dhe infrastrukturën e mbrojtjes dhe sigurisë së NATO-s.

Memorandumi i Mirëkuptimit krijon bazat për ta çuar më tej bashkëpunimin, duke ndihmuar inovatoret ukrainas të orientohen sipas kërkesave të NATO-s, të eksplorojnë mundësitë e testimit dhe të kapërcejnë pengesat për rritjen dhe zgjerimin e teknologjive premtuese. Për NATO-n, ky bashkëpunim më i ngushtë mund të zgjerojë komunitetin e furnizuesve inovativë dhe teknologjive që i kontribuojnë sigurisë së Aleancës, duke forcuar njëkohësisht bazën industriale nga e cila varet siguria kolektive.

Në një kohë kur Aleatëve u duhet të plotësojnë kapacitetet kritike dhe të ndërtojnë një bazë industriale më të fortë e më inovative për të ardhmen, modeli i DIANA-s është projektuar për të lidhur kompanitë premtuese me sfidat reale të mbrojtjes e sigurisë, si dhe për të krijuar rrugëkalime që teknologjitë të kalojnë drejt kapaciteteve operacionale.

/rtsh.al/