Aleksandër Lala është modeli i njerëzve që nuk i nënshtrohen fatit. I lindur në qytetin e Sarandës me probleme serioze në shikim, ai mund të dorëzohej dhe të pajtohej me statusin e njeriut me aftësi të kufizuara, por me Sandrin nuk mund të ndodhte kështu.

”Shkopi” ku ai e ka ndarë mendjen të mbështetet fort, është teknologjia digjitale.

Me ato mundësi minimale që kanë sytë e tij, ai tregon se është bërë një përdorues i kompjuterit, i aplikacioneve  të ndryshme në telefon dhe i pajisjeve të tjera dixhitale.

Aleksandri u shpreh se nuk i mungojnë aftësitë për të qenë i integruar e i përditësuar. “Jemi një grup të Komunitetit të të Verbërve, njerëzit janë të hapur për bashkëpunim”, u shpreh ai.

Aftësimin e tij në komunikimin dixhital, ai e ka kthyer në mundësi për të bërë miq të shumtë e bashkëpunues, në Shqipëri dhe Kosovë.

Objektet që e rrethojnë i vizualizon me mangësi e me vështirësi, por ai nuk ka asnjë vështirësi për të qenë model në komunikim, i përkushtuar në familje dhe i përfshirë në nisma e lëvizje sociale që përmirësojnë jetën.

Gazetare Ledja Fili

/rtsh.al/