Gazeta kryesore e pavarur ruse, “Novaya Gazeta”, njoftoi të premten se po mbyllet, duke thënë se ishte “vrarë” nga presioni shtetëror pas viteve të tëra represioni ndaj gazetarëve të saj, raportimet e të cilëve ishin kritike ndaj Kremlinit dhe luftës së tij në Ukrainë.

Mbyllja e “Novaya Gazeta-s”,  një nga mediat e fundit që kritikoi hapur pushtimin e Ukrainës nga Rusia, shënon pikën më të ulët në fushatën e Moskës kundër zërave disidentë, e cila u përshpejtua pasi Kremlini dërgoi trupat ushtarake në vendin fqinj në shkurt të vitit 2022.

Që atëherë, medias, e konsideruar prej kohësh një bastion i gazetarisë së pavarur, i është hequr licenca,  gazetarët dhe redaktorët e saj janë marrë në pyetje dhe arrestuar nga autoritetet ruse ndërsa janë përballur edhe me kontrolle në banesa. “Novaya Gazeta është mbyllur. Novaya Gazeta po i jep fund ekzistencës së saj”-  tha kryeredaktori Sergei Sokolov në një deklaratë të publikuar në YouTube.

Mes emocionesh, ai shtoi se autoritetet ruse,  shërbimet speciale ruse, e detyruan ekipin editorial të ndërpresë punën. “Novaya Gazeta”, e themeluar në vitin 1993 ishte një nga gazetat më të njohura në Rusi që raportonte dhe dokumentonte shkeljet e të drejtave të njeriut, por është klasifikuar nga Moska si “agjente e huaj”, një etiketim i përdorur për të shtypur çdo zë disident.

Themeluesi dhe ish-kryeredaktori i saj Dmitry Muratov, i cili bashkë me gazetaren e vrarë Anna Politskovkaja, ishin fituesit e Çmimit Nobel për Paqen në vitin 2021 për përpjekjet për të mbrojtur lirinë e shprehjes në drejtimin e asaj gazete.

/rtsh.al/