Forca e Posaçme “Shqiponja”, në bashkëpunim me Specialistët për Hetimin e Narkotikëve, ka goditur një tjetër rast të shpërndarjes së lëndëve narkotike në kryeqytet. Operacioni është pjesë e kontrolleve intensive që policia po ushtron në zona të ndryshme, me fokus të veçantë afërsinë me shkollat dhe ambientet e frekuentuara nga të rinjtë.

Gjatë ndërhyrjes së kryer në rrugën “Petro Nini Luarasi”, shërbimet e Policisë kanë rënë në gjurmët e një shpërndarësi të lëndëve narkotike.

I arrestuari është shtetasi me iniciale A. H. (H), 27 vjeç, banues në Tiranë. Atij iu gjet dhe iu sekuestrua një sasi lënde narkotike e llojit cannabis.

Bashkë me 27-vjeçarin, u procedua penalisht edhe shtetasi R. L. Atij iu gjet një sasi e vogël lënde narkotike, të cilën e kishte blerë pak çaste më parë nga i arrestuari.

Fokusi i operacionit

Policia e Shtetit bëri me dije se ky aksion vjen në vijim të planit të masave për goditjen e fenomenit të shpërndarjes së drogës në pikat nevralgjike të qytetit.

“Shërbimet e Forcës së Posaçme ‘Shqiponja’ kanë shtuar kontrollet me qëllim evidentimin e rasteve të shpërndarjes së lëndëve narkotike, kryesisht në afërsi të shkollave dhe lokaleve,” njoftuan zyrtarisht autoritetet.

Materialet procedurale i kanë kaluar tashmë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, e cila do të vijojë me hetimet e mëtejshme për këtë rast.

/rtsh.al/