Pedro tërhiqet zyrtarisht nga futbolli profesionist. Ky vendim pritej që kur kontrata e tij me Lazion skadoi qershorin e kaluar. Futbollisti spanjoll largohet nga sporti si një nga lojtarët që ka fituar më shumë trofe në historinë e futbollit spanjoll, duke e njoftuar tërheqjen përmes një videoje emocionuese në rrjetet sociale.

Pedro u rikthye në “Camp Nou”, skena ku ai ndihmoi në shkrimin e një kapitulli të rëndësishëm të historisë së fundit të futbollit krah për krah me Messin, Guardiolën dhe skuadrën më të madhe të Barcelonës të të gjitha kohërave.

Videoja përfshin pamje që nisin nga hapat e tij të parë në Tenerife dhe trofetë e fituar me Barçën – të ekspozuar në fushën e “Camp Nou” – e deri te finalja e Kupës së Botës me Spanjën, të shoqëruara me momente kulmore nga karriera e tij te Chelsea dhe Lazio.

Në mbishkrimin e postimit, ai shkruan: “Ndiej se ka ardhur koha. Koha për të hedhur një hap përpara dhe për të nisur një kapitull të ri në jetën time. Largohem krenar që e kam realizuar ëndrrën time dhe falënderoj të gjithë ata që më qëndruan pranë për ta bërë të mundur këtë. Faleminderit, futboll, që më bëre kaq të lumtur.”