Bashkimi Evropian planifikon të vendosë një kuotë kufizuese për importin e automjeteve hibride, sipas një mase mbrojtëse që pritet të hyjë në fuqi më 1 dhjetor. Lëvizja synon kryesisht kontrollin e vëllimit të hyrjes së makinave hibride kineze në tregun evropian, njofton agjencia e lajmeve Bloomberg, duke cituar një dokument zyrtar që ka siguruar.

Sipas këtij propozimi, gjatë vitit të parë të zbatimit të masës, importet do të kufizohen në një prag prej 350,000 automjetesh në vit. Duke filluar nga viti i dytë, ky kufi do të pësojë një rritje vjetore prej 6 për qind.

Afati katërvjeçar dhe parimi i mosdiskriminimit të OBT-së

Masat mbrojtëse parashikohet të mbeten në fuqi për një periudhë katërvjeçare. Gjatë kësaj kohe, si Bashkimi Evropian ashtu edhe palët tregtare do të angazhohen për zbatimin e rregullave dhe standardeve të Organizatës Botërore të Tregtisë (OBT).

Për t’iu përmbajtur strikt parimit të mosdiskriminimit që kërkohet nga OBT-ja, kufiri i importit nuk do të zbatohet ekskluzivisht ndaj Kinës, por do të shtrihet mbi të gjitha importet e automjeteve hibride që hyjnë në territorin e Bashkimit Evropian nga vendet e treta.

/rtsh.al/