Sipas të dhënave zyrtare të Institutit të Statistikave (INSTAT), norma e inflacionit e matur me Indeksin e Çmimeve të Konsumit (IÇK) arriti në 2,9 për qind në muajin shtator 2026, duke shënuar një rritje krahasuar me nivelin prej 2,4 për qind të regjistruar në të njëjtën periudhë të vitit të kaluar. Në nivel mujor, krahasuar me gushtin 2026, çmimet e konsumit pësuan një rritje prej 0,4 për qind.

Rritja vjetore e çmimeve u ndikua në mënyrë përcaktuese nga dy grupe kryesore të shportës.

“Rritja vjetore e çmimeve në muajin Shtator është ndikuar kryesisht nga grupi ‘Ushqime dhe pije joalkoolike’ me +0,96 pikë përqindje, pasuar nga grupi ‘Transporti’ me +0,81 pikë përqindje”, bën të ditur raporti i INSTAT.

Gjithashtu, ndikim pozitiv në rritjen e indeksit dhanë grupi “Qira, ujë, energji elektrike, gaz dhe karburante të tjera” me +0,54 pikë përqindje, si dhe mobiljet, pije alkoolike, restorantet dhe shërbimet financiare. Nga ana tjetër, ulja e çmimeve në grupet “Veshje dhe këpucë” (-0,12 pikë përqindje) dhe “Informacioni dhe komunikimi” (-0,04 pikë përqindje) dha një efekt zbutës në treguesin e përgjithshëm.

Ndryshimet vjetore dhe mujore sipas shportës së konsumit

Në krahasim me shtatorin e vitit 2025, lëvizjet më të mëdha të çmimeve u vërejtën në sektorin e transportit dhe kulturës. Sipas përllogaritjeve të INSTAT, “krahasuar me muajin Shtator 2025, rritja më e madhe e çmimeve vërehet në grupin ‘Transporti’ me 12,4 %, pasuar nga ‘Argëtim, sport dhe kulturë’ me 5,9 %, ‘Sigurime dhe shërbime financiare’ me 4,5 %, ‘Ushqime dhe pije joalkoolike’ me 2,8 %”.

Për sa i përket zhvillimeve afatshkurtra mujore (shtator 2026 kundrejt gushtit 2026), rritja më e ndjeshme u shënua në sektorin e arsimit dhe veshjeve, për shkak edhe të efekteve sezonale të fillimit të vitit shkollor.

“Rritja më e madhe e çmimeve vërehet në grupin ‘Shërbimi arsimor’ me 1,2 %, pasuar nga grupet ‘Veshje dhe këpucë’ me 1,1 %, ‘Argëtim, sport dhe kulturë’ me 0,9 %, ‘Ushqime dhe pije joalkoolike’ me 0,8 %”, theksohet në raport.

Në të njëjtën periudhë mujore, rënie e lehtë e çmimeve u regjistrua te “Kujdesi personal” (-0,4%) dhe “Mobilje e pajisje shtëpie” (-0,3%).

/rtsh.al/