Procesi i regjistrimit të tokës bujqësore dhe pajisjes së fermerëve me Aktet e Marrjes së Tokës në Pronësi, AMTP, ka shënuar progres gjatë këtij viti në qarkun e Shkodrës. Sipas drejtueses së ASHK Shkodër një nga zonat me avancimin më të madh të procesit  është Bashkia Malësi e Madhe, ku edhe kërkesat e fermerëve për pajisjen me AMTP janë më të shumta. Deri tani, në këtë bashki janë miratuar mbi 300 kërkesa për regjistrimin e tokës bujqësore, ndërsa më shumë se 100 të tjera janë në proces shqyrtimi.

“Malësia e Madhe është një nga zonat ku janë dhënë më shumë vendime për miratimin e tokës bujqësore në të gjithë Shqipërinë. Aktualisht, kemi 302 kërkesa të miratuara për zonën e Malësisë së Madhe. Procesi ka nisur në vitin 2023, me krijimin e një task-force për tokën bujqësore, dhe më pas ka vijuar nga AHK Shkodër. Deri më sot, kemi ende rreth 100 kërkesa të tjera në proces, të cilat janë në pritje të miratimit nga bashkia”, u shpreh Eglantina Frroku, Drejtuese e ASHK Shkodër.

Ndërsa në Bashkinë Shkodër, procesi ka nisur dhe po vijon në Njësinë Administrative Guri i Zi, ku deri tani janë trajtuar afro 50 kërkesa për regjistrimin e tokës bujqësore. Sipas drejtueses së Kadastrës, kërkesat për tokën bujqësore nuk mund të trajtohen në mënyrë individuale, por në rang fshati, pasi vendimmarrja kalon për miratim në këshillat bashkiakë.

“Për Bashkinë e Shkodrës, e kemi nisur këtë proces në zonën e Gurit të Zi, ku janë administruar 46 kërkesa për tokë bujqësore. Do të vijojmë më tej edhe me përfundimin e procesit në fshatrat dhe zonat e tjera. Duhet theksuar se kërkesat për tokë bujqësore nuk mund të trajtohen veçmas, për secilin individ, por është e nevojshme të trajtohet i gjithë fshati, duke qenë se vendimmarrja përfundimtare kalon për miratim në Këshillin Bashkiak”, tha ajo.

Regjistrimi i tokës bujqësore në qarkun e Shkodrës është shoqëruar prej vitesh me vonesa dhe ndërprerje të shpeshta. Një prej problematikave kryesore ka qenë edhe refuzimi i fermerëve për t’u pajisur me AMTP, për shkak të mospërputhjeve me kufijtë e vjetër të pronës.

Gazetar: A. Hoti

/rtsh.al/