Java e 7-të e Abissnet Superiore hapet sot me sfidën Dinamo-Teuta, që do të transmetohet drejtpërdrejt në RTSH. Është një përballje kryesuesish, vendi i parë me të tretin, ndaj dhe pritet një 90-minutësh i luftuar në stadiumin “Elbasan Arena”.

Dinamo e vendit të 3-të vjen në këtë ndeshje pas humbjes me Vllazninë dhe nuk do të humbasë më terren në renditje. Përkundrazi, skuadra e trajnerit Daja ka një mundësi të mirë për të shkurtuar diferencën prej 4 pikësh me durrsakët kryesues dhe për të certifikuar pretendimet e saj për titullin kampion.

Kapiteni Dita dhe Hoxhallari pritet të jenë mungesat e bluve në këtë ndeshje, që starton në orën 18:30.

Teuta në anën tjetër vjen në një moment shumë të mirë, pas 5 fitoresh radhazi. Edhe pse kjo skuadër ka bërë shumë ndryshime në grupin e lojtarëve, duket se trajneri Tetova ka ditur t’i sistemojë gjërat shpejt për ta bërë efikase. Ndeshja e sotme është një provë e rëndësishme për “Djemtë e detit”.

Ndeshjet e tjera të kësaj jave luhen të shtunën dhe të dielën.