Aeroporti i Vilniusit në Lituani u mbyll përkohësisht të shtunën, pasi autoritetet morën raportime për një objekt fluturues të paidentifikuar, që dyshohet se ishte një dron dhe mund të kishte ardhur nga drejtimi i Bjellorusisë.

Pas alarmit, avionët luftarakë të NATO-s të angazhuar në misionin Baltic Air Policing u ngritën në ajër, ndërsa hapësira ajrore mbi aeroport u mbyll përkohësisht. Për pasojë, operacionet e aeroportit u pezulluan përkohësisht.

Qendra Kombëtare e Menaxhimit të Krizave në Lituani deklaroi se autoritetet po punojnë për të përcaktuar shkakun e alarmit dhe natyrën e objektit.

Kreu i qendrës, Vilmantas Vitkauskas, tha se objekti mund të kishte ardhur nga drejtimi i Bjellorusisë, por deri tani nuk është identifikuar përfundimisht.

Ky është incidenti i fundit në një seri alarmesh ajrore në vendet baltike, në një periudhë tensionesh të shtuara për shkak të luftës në Ukrainë. Në shtator, një dron që kishte hyrë në hapësirën ajrore të Lituanisë u rrëzua mbi territorin e vendit, ndërsa incidente të ngjashme janë raportuar edhe në Letoni dhe Estoni.

/rtsh.al/