Policia e Lezhës ka finalizuar operacionin e koduar “Second floor”, duke zbuluar një veprimtari kriminale për kultivimin dhe përpunimin e kanabisit në fshatin Rrilë.

Gjatë kontrollit të një objekti trekatësh, u zbuluan 4 ambiente të përshtatura për kultivimin dhe tharjen e bimëve narkotike, të pajisura me llamba elektrike dhe të furnizuara përmes lidhjeve të paligjshme të energjisë elektrike.

Si rezultat, u sekuestruan 8.8 kg kanabis i tharë, 1064 bimë, 960 fidanë, 850 fara kanabisi, 180 gramë kokainë, si dhe armë zjarri, armë sportive, një automjet dhe celularë.

Në flagrancë u arrestuan dy shtetas, babë e bir, ndërsa u vu në pranga edhe një punonjës i OSHEE-së, i dyshuar si bashkëpunëtor. Po ashtu, 4 punonjës të tjerë të OSHEE-së po hetohen për shpërdorim detyre.

Hetimet tregojnë se kjo veprimtari kriminale dyshohet se zhvillohej prej disa muajsh. Materialet i janë referuar Prokurorisë së Lezhës për veprime të mëtejshme, ndërsa hetimet vijojnë për identifikimin e personave të tjerë të përfshirë.

/rtsh.al/