Kryeministri Edi Rama ka njoftuar përmes një postimi në rrjetet sociale miratimin e paketës së re për kujdesin alternativ në familje gjatë mbledhjes së Këshillit të Ministrave.

Kjo nismë synon të forcojë mbrojtjen dhe trajtimin e fëmijëve të cilët përkohësisht nuk kanë mundësi të jetojnë me familjet e tyre biologjike. Përmes kësaj pakete, shteti do të garantojë se fëmijët do të vendosen pranë familjeve kujdestare që janë të trajnuara, të certifikuara dhe të monitoruara në mënyrë të vazhdueshme.

Objektivi, 200 familje kujdestare profesionale

Përmes këtij kuadri të ri rregullator, qeveria synon të kalojë gradualisht nga modeli i përkujdesit institucional në konvikte apo shtëpi fëmije drejt një modeli më human e individual.

“Synojmë ngritjen e një rrjeti prej rreth 200 familjesh kujdestare profesionale në të gjithë vendin, duke bërë një hap të rëndësishëm nga kujdesi institucional drejt një modeli familjar, më pranë nevojave të çdo fëmije.,”, shkruan kryeministri Rama.

/rtsh.al/